Meghalaya Board of School Education (MBOSE) ni bilsi 50 gapaniko maniani bon∙kamgipa salo a∙dokni Chief Minister Conrad Sangma mongsonggipa sokgipa ong∙e bak ra∙angaha. Ia tom∙bimonganio Chief Minister dingtangmancha chadamberangni a∙dokna gamchataniko janape uamangni changa sapaniko aro gisikni seng∙aniko jakkalna namgipa ku∙pattianirangko on∙angan baksa uamangko dakchakna nanggipa ja∙kurangko sorkari de∙anggen ine aganangaha.
Sorkarirang scheme rango mangmang pangchake kam ka∙anichi bang∙bata changon miksongani donggija kamrangko ka∙e name chu∙sokatna man∙rongijaniko nike, sorkari ong∙e an∙chingni chadamberangko mikkango done nambata cholrangko ra∙bana nanga ineba Sangma janapangaha. A∙doko bang∙a neng∙nikanirang donggenchimoba an∙ching pangnan a∙songo poraia skianio nambatgipa ong∙nagita tikkelna nanga. Unbaksana dilgiparang, skigiparang, chatro chatrirang aro ma∙aparangko dal∙drobaenggipa bi∙sarangna namgipa skianiko on∙chinagita CM didiangjolaha.
Assam a∙dokoni jakgitel ong∙aoni ru∙utgija somoion a∙dokni dilgipa gitchamrangni an∙tangtangko on∙kange ia board ko 1973 bilsio ra∙gate a∙bachengatanikoba gisik ra∙e Sangma mittelpilani kattarangko aganangaha. Unbaksana MBOSE ni bilsi 50 gapaniko manianiko da∙al salo chu∙soke matchotatna man∙ahaninaba Chief Minister sakantikon mittelangaha.
Ia tom∙bimonganio Education Minister Rakkam A. Sangma, Chief Secretary D.P. Wahlang aro a∙dokni adita gipin dilgiparangba bakko ra∙angtokaha. Skia poraiana agre mandeni gunko toani maming kolrang dongja aro an∙chingni Chief Minister ni re∙dilanichi a∙dokni skia poraiani gadangko namdapatna ka∙donga ine Education Minister Rakkam Sangma aganangaha.
Batanggimin somoirangko niatgenchimode a∙doko MBOSE baksa bakrimgipa ge 40-50 skul oni 2923 skulrangona bariahani gimin sena ba poraina changani 24.49% oni 80% ona da∙alo tang∙doaniko niknagita man∙aha ine Chief Secretary D.P. Wahlang bon∙kame aganangaha.
