Re·baenggipa Hindu toromni Durga Puja ko maniani salrango name aro tom·tome chu·sokatna man·agita dal·dalgipa bosturangko salruragipa garirangko ia jani 21 tarikoni 24 tarikona dontongatnagita South West Garo Hills a·jani District Magistrate u·iataniko dakangaha.
Magistrate ni u·iatani gitade Damalgre, Gonglangre aro Monabari oni Garobadha ona dakbagipa bajarko napake re·gipa ramarango pujani somoio manderangko naljoke rakkinagita dal·dalgipa aro jrigipa garirangko salna beng·ataniko dakangaha. Gari gorarangni re∙a doaniko champengani mongsongbate October 24 tariko pringni 11 bajioni attam 7 bajiona Durga pujako manianio re·jomanirangko dakani somoio ramao maming a·sel ong·gija tom·tome matchotna man·agita miksonge ge·etataha.
