West Garo Hills a∙jani Raksamgre Civil Sub-Division ni ning∙o donggipa Dildegre songo Jio tower songaniko matchotgija galchipe donenggipako matchote tarie on∙china October 18 tariko Bawagre Sub-Unit ni A∙chik Holistic Awakening Movement (AHAM) dolrang Jio Center ni Managerko gronge chittiko on∙angaha. Ia Jio tower ko 2019 bilsini gisepon songni manderang baksa meligrike 2020 bilsion songnagita kamko a∙bachengataha jekon da∙alona kingkingba matchotgija galchipe donkuenga ine AHAM dol parakataha.
Dildegre songo mobile tower rang ge∙saba dongjani a∙selo songdongenggipa manderang namen neng∙nikanirangko man∙enga ine AHAM u·iataha. Ia neng∙nikanirangko jako ra·gipa department ni gita nirokate ta∙rake kam ka∙atpachina aro matchotgija donenggipa jio tower ko ta∙rake matchotatatchina AHAM Bawagre sub-unit ni Vice President Briwat Sangma mol∙molaniko dakangaha.
