Meghalaya Board of School Education (MBOSE) ni bilsi 50 gapaniko maniani bakgita da∙al pringo rally ko NH-51 Rebels dol, MBOSE-o kamko ka∙giparang aro skulrangni chatro chatrirang bakko ra∙e a∙bachengangaha. Re∙chakatna skang rally o ja∙rikna nanggipa niamrangko MBOSE Tura-ni Director Administration, MCS, Rikse R. Marak talate on∙angaha aro rally ko MBOSE office oni a·bachenge Green Haven o dontongataha.
MBOSE ni Executive Chairman aro Retired IFS, C.P. Marak re∙bagipa pilak dakchakgiparang, medical dol, skulni chatro chatrirang aro NH-51 dolko rimchaksoan baksa mittelangaha. Unbaksana tom∙anio Marak aganengon batanggimin bilsirango MBOSE o kam ka∙anggiparangni bimchipe dangdike on·ani a∙selo MBOSE bilsi 50 gapna man∙aha ine mittelpilani kattarangko aganangaha.
MBOSE ni bilsi 50 ong∙aniko manianiko da∙aloni October 19 tarikona salgittamna ong∙atangenga. Ia maniani bako adita tom∙bimonganirangko ong∙atangna miksongenga jeon 18 tariko Deputy Chief Minister Sniawbhalang Dhar mongsonggipa sokgipa ong·e bakko ra·an baksa Education Minister Rakkam A. Sangma, Education Department ni Commissioner aro Secretary Pravin Bakshi re∙bae bakko ra∙anggen.
October 19 tariko bon∙kamgipa maniani salo a∙dokni CM Conrad Sangma mongsonggipa sokgipa ong∙e programona sokbana manchian baksa Education Minister, a∙dok sorkarini Chief Secretary D.P. Wahlang gipin niksenggipa sokgiparang ong∙angskagen. Apsan salon skulni chatro chatrirangna batanggimin somoio kal·suaanirango chegiparangna boksisrangkoba on∙aniko dakanggen.
