Meghalaya Cricket Association (MCA) ni bilsi 19 ni ning∙o Vinoo Mankad Trophy o cricket kal∙enggipa me∙asa aro me∙chik dolgnian amma cha∙na nangao ga∙akaha. Me∙asa dolrang Uttarakhand baksa 296 run rangchi sirikaha aro me∙chik dolrangko Tamil Nadu wicket 10 chi amatskaaha.
Uttarakhand skanggipa dokchenge Aarav Mahajan 140 run aro Poorvansh Dhruv 174 run rangko dokanichi over 50 o 430 runrangko chu∙gimik sak 7 wicketrangko ga∙akate man∙aha. Meghalaya dolni robol gogiparangoni Shavian Blah over 10 o sakgni wicket ko ra∙aha, Angkit Tamang over 10 o sakgni, D Marak aro Charm Marbaniang sakprak wicket rangko ra∙aha.
Meghalaya chenagita rikanio chu∙gimik 134 runrangkosan 47.4 over o man∙aiaha. MCA ni dokgiparangoni Shubham Rasaily 29 run, Tamang 18, Rituraj Rabha 17 aro Avinash Rai 13 run rangko man∙aha. Sombar salo Meghalaya a∙dok Hyderabad baksa kal∙angskagen. Apsan daken me∙chik dolrangoniba kal∙a gimiko 44 runrangkosan tarina man·e Tamil Nadu dolni jakchi altubee amatako man∙angaha.
