MBOSE ni bilsi 50 gapaniko jubilee maniani bak gita Inter-School choir competition ko Tura District Auditorium o da∙al salni bako ong∙atangaha. Ia git ring∙susaani programona Garo Hills ni kona noksikoni dingtang dingtang skulrang re∙bae bakko ra∙angaha.
Ia competition o Don Bosco Higher Secondary School, Tura skanggipa biapko man∙angaha, gnigipao Educere Secondary School, Williamnagar aro gittamgipa biapko Auxillium Secondary School, Tura man∙angskaaha. Susaanio chegipa dolna tangka gong 30,000 ko on∙aha. Apsandaken gnigipa aro gittamgipa biapko man∙gipa dolrangnaba tangka gong 20,000 aro gong 15,000 koba on∙angaha. Chegipa dolrangna tangkarangko on∙an baksana trophy aro certificaterangkoba on∙angjolaha.
Ia git ring∙susaanio nambatgipako nisusae seoknagita Tura Music Skulni Director Tengrang R Sangma, Asher Dongkamchi Sangma aro Shammy Ch Momin dakangaha.
