September jani 18 tariko GHADC ni Chief Executive Member (CEM) Albinush R. Marak, council o kam ka∙enggiparangna ja 31 na man∙kugija dongenggipa dormahaoni jagniniko on∙chengna gita ku∙chakgiminko on∙gija donengani gimin salgittam na jingjengataniko dakna tik ka∙angaha.
Uamangna jagnini dormahako on∙a gita ku∙chakgenchimoba council ni dilgiparang tangka paisarangni bidingo maming tarisamsoani dongja ine Non-Gazetted Employees Association (NGEA) janapangaha. Ia jingjengataniko NGEA October 10 oni salgittamna GHADC office ni a·palo dakanggen ine koborna parakataha. Dormaharangko man∙jaengani a∙sel nokdango tangka paisani gita bang·a neng·nikanirangko man·enga ine NGEA ni President Brithen Sangma prakangaha.
Dormarangko on∙a chu∙sokja ine CEM ni kosako matnanganirangko janapon, council o dingtang dingtang neng∙nikarangni a∙selo tangkarangko watatna ja∙manchakuenga ine CEM parakangaha. Council ni EC Secretary saa ding∙aniko man∙e dongenga aro Head Accountant Shillong chi nanga kamrangna re∙anga ineba ua janapangaha. Tangkarangko ka∙sinsin watataniko dakanggen aro dormarangkoba pakwatanggen ine Marak a∙kange ra∙angaha.
