Dudhnoi, Assam oni Garo Hills ni adita biaprangona dakbagipa ramani dal∙begipa projectko kamna nakatchengaoni bilsisa ong∙pile tarigija galchipe donenganina AHAM dolni ma∙mong, Chief Minister Conrad Sangmako aganchakchina lekka see didiataha. Ia ramako Rongjeng, Baghmara aro Dalu jolko napake koela salna jakkalengani gimin tarigija donchipanina janape AHAM dolrang u·iataniko dakangaha.
Garo Hills na ia ramako tarie on∙achi manderangni janggi tanganiko tang∙doatna aro kajina man∙aniko baridapatna miksongani donggenchimoba, kamrangko ka∙gija donanichi batesa jolni manderangni dake cha∙anio, sanna bannanio, naljokanio aro gipin bakrango neng∙nikanirangko ra∙baenga ine AHAM central executive board ni President Georgeprince Ch Momin parakataha. Ia ramako kam ka∙ninggija galchipanina, manderangni nang∙nike badi ka∙doe sing∙doanina sorkari ia project ni DPR ko nipilkuenga ine aganchakaniara maiba kakketgijani kamko mesokenga ine uamang janapangaha. Ia ramako tarigija donanichi Garo Hills na dal∙a gimaaniko ra∙baenga maina ia ramagitan Bangladesh a∙songchinaba koela watna chanchimanaha ine AHAM dol janapangaha.
Ramako tarigija ru∙utate donaiode mikkangchi bostu salruraani somoirango ramarango a∙sel ong∙anikoba chagronggen ine AHAM dol parakangaha. Unbaksana project ni nakataoni bilsisa gapiloba maming taridape on∙a a·bachenganiba dongja aro ramarang nosto ong∙a batroroenganiko niknagita man·enga jeon mongsongbate Siju-Baghmara-Gasuapara oni Dalu ona re∙gipa bak namjabataha ine uamang janapangaha.
Ramani namgijanichi songremiting somoio a∙sel ong∙anirangko chagronga nangenga aro mongsongbate sagipa manderangna, an∙o donggipa ma∙giparangna neng∙nikaniko on∙batenga ine AHAM dol parakangaha. Ia ramako tarininggija donaigenchimode korosrang batroroanggen jeon kajina gamgija ramram manderangsa sikkimaona sokgen ine janape sorkariko project ni bidingo manderangna ma·siate kamrangko ka∙china didiangaha.
