Ia bilsio Meghalaya Board of School Education (MBOSE) ni bilsi 50 gape Golden Jubilee ko maniangani bak gita da∙al salo skulrangni gisepo budu salgrikaniko Matchakolgre skulni bakrao susagrikaniko dakangaha. Ia budu salsusaaniko MBOSE aro WGH a∙jani District Sports office bakrime ong∙atangaha. Kal∙chakramona LSEO, Joint DSEO ni officer Senora N. Sangma aro MBOSE Tura ni Controller of Examinations, TR Laloo mongsonggipa sokgipa ong∙e re∙baaha.
Ia susaaniona WGH a∙jani adita skulrang jekai Mothers Union Secondary School, Don Bosco Higher Secondary School, Rootland Secondary School, Sherwood Higher Secondary School aro Monfort Centre for Education ni chatro chatrirang re∙bae bakko ra∙angaha.
Me∙asarangni gisepo Don Bosco Higher Secondary skul chegipa ong∙aha aro gnigipa biapko Sherwood Higher Secondary skul man∙angskaaha. Me∙chikrangni gisepo Monfort skul chegipa ong∙aha aro gnigipa biapko Mothers Union Sec. skul man∙angskaha.
Kal∙susaani bon∙kamgipa bako chegipa chatro chatrirangna medalrangko Senora N. Sangma ni jakchi on∙angaha. Unbaksana skanggipani biapko man·gipa skulrangna tangka gong hajal 10 aro gnigipani biapko man∙giparangna tangka gong hajal 7 baksana boksisrangko October jani 19 tariko Niksenggittim, Green Heaven-o MBOSE ni Golden Jubilee ko maniani salo on∙anggen ine MBOSE Tura-ni Event and Program Committee ni Convenor Junumbirth S. Sangma Ku∙rongdik kobor ra∙timgipana aganangaha.
