Bamboo Resource Assessment Training ko Garo Hills ni Village Community Facilitator (VCF) rangna kattachi skie on∙aniko aro Boldorenggre songna kamchi dake mesokaniko Tura, Dakopgre SMELC o salgnina ong∙atangaha. Ia training programko Community Led Lanscape Manangement Project (CLLMP) ni changgipa sapgipa, State Program Management Unit (SPMU) ni Environment Management Manager aro CoE ni ka·rimskarangni bakrimanichi chu∙sokatna man∙aha.
Ia programko ong∙atanichi wa∙a man∙gipa biaprangko u∙ina, mikkangchi wa∙ako ge∙ani namgniko niksamsoani aro gipin nanggipa changa sapanirangko VCF dolrangna wa·ako jakkalanio baikamgipa ong∙e ranta ka∙aniko skie on∙angaha. Ia skie ra∙ani programona ge 33 VCF rang aro CLLMP unbaksana SPMU o kam ka∙giparang bak ra∙angaha. September 27 tariko Boldorenggre songona dingtangmancha re∙ange skie on∙anio kamoni neng∙takgimin IFS Director aro CoE ni Chairman S. Ashutosh, MBDA ni DPM Sitaram Prasad Shad dongpae bakko ra∙angaha.
