Tura ICFAI University ni Tourism & Travel Management department rang Meghalaya Tourism department baksa bakrime buring bolgrimko ripingna aro tourism ni a·bao baikamgipa biap ong·atna ja·ku de·na miksonge World Tourism Day ko maniangaha. Ia salko manianigita uamang Pelga dare ni wilwila biaprangko rongtalatangan baksana SWGH ni Ballonggre Model Village o bol ge·anirangkoba dakangaha.
World Tourism Day ko manianio Tourism and Travel Management department ni skigiparang aro chatro chatrirang gisiko nangbee bak ra·aniko nikangaha. Ia salko manianio “Tourism and Green Investment” katta bichongo pangchake tourism industry ko namdapatan baksana buring bolgrimni gamchatanirangko ma·sie ripinge rakkina mangsongangaha.
Tom·aniona sokbagipa Tourism department ni Officer Ava Shereen Sangma bidako pakwatgiparang baksa sorkari bakrime kam ka·anichi tourism ni a·bao namgipa aro baikamgipa ong·na man∙ani bidingo aganangaha. Unbaksana ICFAI University Assistant Professor Ellerie N Arengh Tourism and Green Investment ni miksonganirangko nambee agantalate on·angaha.
World Tourism Day aro Swacch Bharat ni gita anti gimik gisik ra∙e Tura ICFAI University ni manianganiara mikkangchi poraiani a·damrango buring bolgrimko ripingani aro tourism ni a·bako namdapatna ja·ku de·anio sakantina namgipa dakmesokani ong·a.
