South West Garo Hills-o District Development Co-ordination & Monitoring Committee (DISHA) tom·aniko Ampati DRDA conference hall-o ong·atangaha. Ia tom·anio Tura ni MP Agatha K. Sangma, DISHA ni pilak kam ka∙anirangko Rangsakona ni MLA Subir Marak, aro Mahendragangj ni MLA Sanjay Sangma ni dongpaanio tom∙e nipilangaha. Ia tom∙anio SWGH a·jako silroro namroroatna nangchongmotgipa kamrangni bidingo chanchirimangaha.
Ia tom·anio ge 15 department rangoni sokbagiparang uamangni department ni ning·o project rangko kam ka·ani bidingo baditana chu·sokaha, mai neng·nikanirangko chagrongenga aro mikkangchi maiko dakna miksongenga sakprakan nambee agantalate on·angtokaha. Ia chanchirimanio sakantian ning·tue chanchie neng·nikanirangko ga·changbate a·jani namgnina aro department ni kamrango man·a dipet ta·rake chu·sokatna jotton ka·na mangsongangaha.
Man·a kragipa manderangni loan na dorgasto galgiparangko bank rangni ra·chakgijaniara uamangni man·a ka·donganiko ra·onaona sokata ine MP Agatha Sangma janape aganangaha. District Industries centre (DCIC) aro bank rang bakrime kam ka·anio dakchakaniko on·genchimode man·a kragipa manderangna project rangko jako ra·e kam ka·na loan rangko nengrae man·gen ineba Sangma aganangaha. SWGH a·jako tang·doatnagita dingtang dingtang sorkarini department rang bakrime kamrangko ka·anichisa nambatatna amgen ine Sangma didianiko on·angaha.
A·doko skia porani gadangko nambatatna Rangsakona-ni MLA Subir Marak Kasturba Gandhi Balika Vidyalaya (KGBV) ko Damalgreona ra·bana mangsonganikoba parakangaha. Unbaksana Mahendraganj ni MLA Sanjay Sangma, a·jao sanchakram biaprango namdapataniko dakanio matchotkugijagipa kamrangko niroke ta·rakkale chu·sokatchina janapangaha.
