Selsella-Balachanda ramani obosta namen namjabeanina Selsella unit-ni A·chik Students’ Welfare Association (ASWA) ni President H N. Sangma ta·rake taridape on·china gita Public Work Department (PWD) ni Minister Prestone Tynsong na chitti see mol·molaniko dakangaha.
Ia rama jolo songdongenggipa manderangna gamchatbegipa ong·genchimoba ramani bang·bata bakrango a·kilokrang donganichi aro re·na dona namsrangjahani gimin salantio bajar anti re·gipa, sanna bannaniko dakna re·gipa, bading chiwalgipa aro skul college re·ruragiparangna neng·nikbeani ong·enga ine ASWA dol parakataha.
Ia obostarangko chagrongani a·selo songsalni nanganina re·a doanio mongsongbate mikka waani somoirango namen neng·nikani ong·enga ine uamang u·iataha. Una agreba namgijagipa ramako re·anichi gari gorarang nosto ong·ataniko man·enga aro songreanio bakandikgipa rama ong·genchimoba ru·uta somoirangko nangenga ine chittio janapataha.
Ia ramarangko somoigita ta·rake taridape on·genchimode jolo songdongenggipa manderangnasan namgni ong·aigija a·dokni chu·gimik tang·doaniba dakchakani ong·gen ine ASWA dolrang mol·molataha.
