SGH a∙jao Gasuapara jolni chatro chatrirang aro songko nokko dilenggiparang nangrime Civil Sub-Division gitalko songe on∙ani cholrangko am∙sandichina sorkariko mol∙molana tom∙e chanchirimangaha. Uamangni tom∙anio Civil Sub-Division ko songe on∙anichi SGH a∙jao man∙enggipa koelarangko Bangladesh ona badingatna tarake kamrangko ka∙nagita miksonge chanchirimangaha.
Ia tom∙aniko songni Nokma, GSU, AHAM, chatro chatrirang aro ma∙apaarang uamangni neng∙nikanirangko sorkariona sokatna aro u∙iatna miksonge ong∙atangaha.
Gasuapara SGH Baghmara aro WGH Civil Sub-Division Dalu ni gisepo donggipa biap ong∙a. Gasuaparao gital Civil Sub-Division ko songna sorkarini officerang, Community Development Block, SBI branch, Police Station, Post Office, PHC, bazar antirang dongan baksana manderangba kraagitan jelaha ine gital Joint Action Committee aganangaha. Gasuapara damsa Bangladesh a∙songona koela watgipa mongsonggipa song ong∙genchimoba galchipe dongipa biap ong∙a jeon songko napakgipa highway rama namsranggijako indita bilsirangna tarigija donaha. Unbaksana ADHOC skulrang sorkarioniko bilsi 20 mangna maming dakchakaniko man∙jaenga ine committee janapangaha. ADHOC skulrangko niroke kam ka∙pachinagita Education Minister Rakkam A. Sangma ko gronge mol∙molaniko dakanggen ine AHAM ni dilgipa Sengrik Marak parakangaha.
Gasuapara songo Civil Sub-Division gitalko songe on∙engenchimode songni aro wilwilao donggiparangni neng∙nikanirangko sorkariona sokate manderangna namgniko ra∙baani ong∙gen ine committee parakangaha.
