Salantion jakkalna nanggipa bosturangni dam barianiko champengna a∙dok sorkarini gita ja∙ku de∙anirangko Mawphlang ni MLA Matthew B. Kurbah ni sing∙anirangna da∙al salni bako Food Civil Supply & Consumer Affairs ni Minister Comingone Ymbon aganchakaniko dakangaha. Comingone Ymbon ni agananigitade, niam gri pala sim∙aniko dakani aro bosturangni damrangko dongimin damna bate palanirangko somoigita nirokaniko dakna a∙dokni pilak Deputy Commissioner aro Sub-Division Officer-rangna sorkari ge∙etanirangko dakataha. Unbaksana a∙doko bosturangko niamgri dongimin damrangna bate pala sim∙aniko dakenggiparangni kosako Essential Commodities Act, 1955 aro Prevention of Black Marketing and Maintenance of Supplies of Essential Commodities Act, 1980 o pangchake niamko pe·giparangko kragipa sastiko on∙anggen ine Ymbon aganangaha.
A∙jani DC aro SDO rangna District aro Sub-Division Vigilance Monitoring Committee, chong·motan nirokna gita committee-rangko songe on∙china sorkarioni u∙iatanirangkoba on∙manaha. Ia committee ko songaniara bosturangko badingani aro chimonge done damrangko bariate palanirangko niroke kam ka∙angna aro champengnagita dakchakanggen ine Ymbon aganangaha. Price Monitoring Centre rangko jakkale nangchongmotgipa bosturangni damrangko porikka ra∙e nianirangkoba dakenga ine Ymbon agandapangaha.
