A∙doko gimagnigipa project rangoniko Revamped Distribution Sector Scheme (RDSS) ni ning∙o gong 700 crore tangka paisarangko bijoli sualenggipa department ni ra∙bapile kam ka∙na nakatataniara sorkarini manderangna donnugija parake kam ka∙aniko mesoka ine Conrad Sangma aganangaha. Ian dal∙bea kamko ka∙na nakatatgipa tangkarang ong∙a jekon donuani donggija sorkari cabinet ni mikkango done manderangni gisepo ma∙sisretaniko ra∙bajanagita dakani ong∙a ine Sangma aganangaha. AITC ni dilgipa Dr. Mukul Sangma, cabinet ni iako ra·chakani bidingo sing∙doaniara sorkarini mesoke kam ka∙aniko sing∙doani ong∙a jekon donnue dakna miksongani dongode chinga maming saloba cabinet tom∙aona ra∙bajawa ine Sangma aganchakatskaaha.
Rural Electrification Corporation (REC) na changgni chittirangko seate kamrangko nakatataianio neng·nikanirangko janapataha aro pilak dakna nanggnirangko ja·rikenga jekon REC ni ra·chakaniko man·esa sorkari re·mikkanggen ine Sangma aganangaha. Iani bidingo Sangma an·tangan Power Minister AT Mondal baksa name chanchirime manderangni mikkango parake maming jajaanirang donggija dakna ja·ku de·aha ine ua agandapangaha. Sangmani agananigitade Dr. Mukul Sangma iako ong·gija chanchisretahakon aro batesa cabinet ona ra·bae manderangna parake dakani kamko namnikpaaniko on·a nanga ine Sangma parakangaha.
