Da∙al salni bako Pradhan Mantri Khanij Kshetra Kalyan Yojna (PMKKKY) Scheme ni bidingo Chief Minister Conrad Sangma sorkarini kam ka∙anirangko assembly o parakangaha. Gambegre ni MLA Saleng Sangmani chu∙gimik chamatgimin tangkarangko sing∙aniko dakon Sangma da∙o dipet a∙dokna gong crore 63 ko chamataha aro 50 per cent mangnigita dongkuenga ine parakangaha. Scheme ni ning∙ao mangsongbate dingtang dingtang a∙jarango nanganirangko ma∙sie 60 percent ni gita jakkalna nanganirang donga ine Sangma u∙iatangaha. Uni janapgipa kamrangara rongtalgipa chi ringanirangko sokatani, sanna bannani, chadamberangna changa sapaniko skie ra∙na training program, skia poraniko namdapatani, bol wa∙arangko ripingani, be∙ennigita bilgrigiparang, bi∙sarang aro butchuma budeparangna dakchakaniko on∙anirang ong∙a ine Sangma parakangaha. Ia kamrangko ka∙na sorkarioni tangka paisarangko watatani ja∙mano District Committee ni gita jako ra∙e kam ka∙enga ine Sangma janapangaha.
Garo Hills ona chamatgipa tangkarangko jakkalani bidingo Gambegre ni MLA Saleng Sangma ni sing∙on West Garo Hills a∙jao gong crore 6,14,19,905 aro East Garo Hills a∙jao gong crore 5,72,400 tangkarangko chamataha ine Sangma aganangaha. Ia tangkarangko a∙jao 2020 aro 2021 bilsini gisepo dingtang dingtang skul nokrangko taridapna jakkalangaha ine Sangma parakangaha. Scheme ni ning∙ao sorkarini kam ka∙anirangko ma∙sina man∙agita sorkarini bilsi gimiko kam ka∙aniko website o segate aro assembly noko ra∙bae dona nanga ine AITC ni dilgipa Dr. Mukul Sangma didianiko dakangaha.
