Skigiparangko kamna rimnapanio School Managing Committee (SMC) rang sorkarini donggimin niam retirangko ja·rike kamna rimnapaniko dakna nanga ine Education Minister Rakkam A. Sangma mijal salni bako u·iataniko dakangaha. Bang·a somoirangon SMC rangni skigiparangko kamna rimnapanio skulrango bil gnanggipa manderang an·tangtangni man·gnina simsakgija aro an·tangtangni manderangkosan kamna rimnapnagita ramarangko tarie on·rongenga ine matnanganirangko nikna gita man·enga.
Uamangni kamko chu·ongnikgijagipa adita kamna galgiparang changni chang bichal ka·e on·gipa manderangchi kakket obostani bidingo gronge agangrikaniko daka indiba bang·bata namgipa skigiparangan nanggrikaniona sokatna sikjae gelaniko dakronga.
Mitam SMC rangni mikkang nitee kamna rimnapaniko dakani bidingo sing·aniko dakon, committee-rang apsan melie sorkarini on·gimin niam retirangko ja·rike kamrangko ka·na nanga ine Sangma aganangaha. Adita kamna galgiparang ia obostako chagronggiparang u·i ma·siatgija kamna rimnapaniko bidingo sandion, SMC rang kamna rimnapanio man·a kragijagipa manderangba donga ine knana man·enga ine Sangma aganangaha.
Skigipani kamko ka·soenggiparangni bimungoba kamna rimnapanina aro dingtang dingtang skulrango kamna rimnapanio newspaper rango nakatate u·iataniko on·gija sriksrik rimnapaniko dakani bidingoba matnangataniko nikna gita man·angaha ine ua aganangaha. Sorkari skulrango kragipa manderang man·a gita, kamna rimnapanio namdapataniko dakangchina didian baksa skulrango niamko ja·rike skigiparangko seokna nanga ineba Sangma agandapangaha.
