Rajabala ni Bharal Gaon songoni Karimul Islam ko niam gri skigipani kamna rimnapaniko department ni gita niate uni kamoniko ra∙galchina Garo Hills Youth Organisation (GHYO) ni President aro Advocate Nazmul Hashan u∙iataha. Karimul ko Dadenggre Sub-Division ni ning∙o Gasbari Non-Govt. L.P. School o niam gri skigipani kamna rimnapaniko dakaha ine koborna parakataha.
Nazmul ni aganani gitade, niam ni a∙palo kamna rimnapaniko dakaniara sorkarini dongimin niamko pe∙ani ong∙a jeon elementary skul rango skina gita MTET porikkako pass ka∙na nangchongmota. Karimul ni kosako Director of School Education & Literacy (DSEL) nigita am∙sandianirangko dakanio uni MTET porikkako pass ka∙kujaniko u∙ina man∙aha. Kakketgipa obostarangko ma∙siani ja∙mano July 19 tariko Karimulko ra∙gale gital dake kamna nakatataichina aro MTET ko matchotgipa mandekosa ta∙rake rimnapchina Dadenggre ni Sub-Divisional School Education Officer (SDSEO) Rajan Kumar Hajong ko DSEL ge∙etaniko dakataha.
Ge∙etanirangko on∙mangenchimoba, Karimul ni skul ona re∙ange skianiko dakuenganiko nikna man∙anina sani ge∙eatanichi uko skulo skina on∙kuenga ine Nazmul sing∙doaniko dakangaha. Karimul ko mikkangchi skulo skina on∙angkuode niamo pangchake Head teacher, School Managing Committee (SMC) aro Cluster Resource Person (CRC) rangni kosako sorkarini niamko pe∙anina sinjetaniko dakangskagen ine Nazmul u∙iatangaha.
