Tura songjinmao ong∙atenggipa Inter Church Fathers’ Fellowship Football Tournament 2023 ko da∙al salni bako bon∙kamgipa kal∙susaanio Niksenggittim Baptist mondoli aro Rongkhon Songgital Baptist Mondoli baksa kal∙e matchotangaha.
Niksenggittim dolrang chu∙gimik goal 2 ko chipaha aro Rongkhon songgitalrang kal∙a gimiko chipna man∙jae kal∙susaanio sirikna nangaha. Niksenggittim doloni Malcolm J G. Momin aro Jallim M. Marak goal prak chipna man∙aha unbaksa best goalkeeper ko Chingrak R. Marak man∙angskaaha. Niksenggittim dolni captain Mittil Sangma ni agananigitade uamangni bon∙kamgipa kal∙anio chena man∙aniara nokgipani dakchakani aro krenge jotton ka∙anichi ong∙aha ine parakangaha.
Ia tournament gimiko nambate kal∙mesokanggipani bimingko Nikwatgre mondolini bilsi 52 ong∙gipa Helen T. Sangma man∙angaha. Apsandake goal bang∙e chipatgipani bimingko Nikwatgre mondolini Rajiv T. Sangma aro Hawakhana mondolioni Clever G. Momin naba man∙angskaaha.
