Meghalaya Teachers Eligibility Test (MTET) porikkako pass ka∙giminrangko ta·rake kamo rakkichina nangnike dabianio Garo Students’ Union (GSU) Western Zone Dadenggre chakpaaniko on·angaha. GSU dolrang Bristibar salo Dadenggre Civil Sub-Division-ni ning∙o pass ka∙giminrangko kamo rakkina ru∙utatani ja∙pangrangko Sub Divisional School Education Officer (SDSEO) ko talatchinagita dabiangaha.
Iani bidingo Education department na aganchakna chu∙ongagita somoirangko on∙manahaoba GSU rangni ku∙jokgija dongani gimin depatment maming agantalataniko dakangjaha ine janapataha. Tura, Baghmara, Ampati aro Khasi-Jaintia Hills rango kamna rakkiani skanggipa phase-ko matchotna man∙ode Dadenggre-o ia apsan kamrangna rimnapaniko maina ja·manchakskaenga ineba GSU rang sing∙doangaha. MTET porikkao chu·sokgiparangni skanggipa batch-na gital dake kamo rakkianiko taraken dakchinagita daitoko ra∙enggipa department rangko GSU Dadenggre Western Zone mol·molangaha.
