Gisikni an∙seng baljoke dongani bidingo mikrakataniko on∙a September 7 tariko Medical Department aro Turani bike salgipa dol A∙kawe Motorcycle Club bakrime Mental Health Awareness programko SWGH a∙jao ong∙atangaha. Ia programko re∙baenggipa World Mental Health Day ko manina tarisamsoanigita aro dingtangmancha gisiko an∙seng baljoke songsalo janggi tangani gamchataniko u∙iatna miksonge ong∙atangaha. Ia somoio bikerangko saljomaniko ka∙e songsa songgipino bike salgipa dolrang programni miksonganirangko agantalate on∙angaha jekon SWGH District Mental Health Programni Nodal Officer, Dr. Matgrik K. Sangma oprakate on∙aniko nikna man∙aha.
Ia program o bak ra∙gipa bike salgipa dolrang uamangni cholarango ‘Mental Health Matters’ ba gisikni an∙seng baljokani gamchata ine noksarangko see jote uamangni bakrimpaaniko mesokangaha. Uamang ia bike saljomaniko Ampati Multi Facility Centre oni a∙bachengate Salmanpara aro Purakhasia ko napake Mahendraganj o matchotataha. Re∙baenggipa salrango a∙jani District Mental Health Program-nigita an∙tangtangko so∙ote sianiko champengna mikrakataniko on∙a miksonganio cricket kal∙susaanikoba ong∙atanggen ine koborna parakataha. Ia kal∙susaaniko pulis aro medical department, Betasing kal∙chakram a∙bao susaanggen.
Unbaksana gisiknigita bilgrianiko man∙enggipa manderang aganku∙pattianiko nanggenchimode tangka gri ka∙na man∙gipa 9362749484 number ona ka∙e janapatpachina Dr. M. K. Sangma mol∙molanikoba on∙angaha. Ian SWGH a∙jani ning∙ao gisiknigita bilgrianiko man∙enggipa manderang songsalo jakgitele aro mande ra∙a gnang janggi tangna man∙agita mikrakaniko on∙enggipa program ong∙a.
