Mawsynram ni gitcham MLA mijal salni bako BJP doloni ong∙kate an∙tangni NPP dol baksa bakrimna skaniko da∙alo parakataha. Ua re∙baenggipa September 13 tariko NPP dol baksa bakrimaniko ra∙chakangaha ine u∙iatangaha.
Uni NPP o napna miksonganiko sing∙anina aganchakengon ua skotong Minister Conrad K. Sangma ni dilanio aro a∙dokko re∙dilanio pangchakesa party baksa bakrimna manchiangaha ine aganaha. Re∙anggipa bilsi bongao Chief Minister ni sorkariko dilanichi a∙dokona bang∙a dingtangatanirangko ra∙baan baksa mikkangchinaba nambata cholrangko nikangna man∙angkugen ine Shangpliang parakangaha. Unbaksana a∙dokko mikkangchi silroroataniko ra∙bana amgipa NPP party san ong∙a ine ua agandapangaha.
NPP baksa bakrimani ja∙mano party ni saksa member ong∙e angna daito on∙ao pangchake party na dangdike on∙anggen ineba Shangpliang aganangjolaha.
