GHADC o a∙arangko name ma∙sie see rakkina man∙agita GHADC ni CEM Albinush Marak aro Deputy CEM Nikman Marak, Garuda UAV ni Senior VC Business Development Sanjay Salian baksa tom∙e golporimangaha. Garuda UAV ge∙sa dingtang dingtang chasong gitalni kolrangko jekai sildoreng bi∙sa ba drone, helicopter aro minggipin cholrangko jakkale a∙ako nambate ma∙sina aro see rakkina on∙gipa company ong∙a. Uamang ia kolrangko kosakgilgil jakkale a∙ani dal∙a ba chonako nie aro kakketgipa bimangko name dake tochenge see rakkina dakchakaniko on∙gipa ong∙a.
Ia tom∙anio Sanjay Salian GHADC ni CEM rang baksa ong∙pae uamangni miksongani aro kam ka∙ani ramarangko agantalate on∙anganiko dakangaha. Uamangni agantalate on∙anigitade ia kolrangko jakkale adita a∙ani gimin ma∙siani ja∙mano talbatnagita biapona re∙ange nina nanggen ine u∙iatangaha. Iako dakanichi a∙jarango rama, chibol, chibima aro buringrangko jakkalaniko u∙ina dakchakani ong∙angskagen.
