Re∙anggipa July 24 tariko winter capital aro backlog policy ko nipiltaichina okgimu chake ACHIK dolni dabianiko dakdilani somoio saksa mongsonggipa dilgipa GSMC ni Co-Chairman Balkarin Marak ko jasa na batpile katchipe dongengako EGH a·jaoniko rim∙aha. Uko Simsang chirikamo donggipa Bansamgre songoniko WGH aro EGH a·jani pulis dolrang bakrime Robibar pringo rim∙e, salgnina pulis rangni jako donataha ine koborna parakataha.
Turao a·sel ong·gipani bidingo ACHIK dolni dilgiparangoniko Laben Ch. Marak ko August 17 tariko rim·aha aro mijal salni bako Balkarin Marak koba rim·aha. Da·o ACHIK dolni dilgiparangoni saksa Advocate aro General Secretary Bernita Marak ko pulisna bame on∙china u∙iataniko jechake kate dongengako rim∙na am∙sandianiko dakenga ine parakataha.
July 24 tariko a∙sel ong∙aniara Dakopgre o Commissioner of Division Office o Chief Minister Conrad Sangma ACHIK dol baksa Turako winter capital na dabie agan golpogrikaniko dakengmiting somoio golmal ong∙anichi ro∙ongrangko goe, bosturangko nisiate, pulis ni garirangko so∙e, pulis dolrang aro manderang saknaaniko man∙angaha.
Ua obostao jako donggiparangko sak 50 mangna batpile rim∙aniko dakangaha aro ACHIK dolni Laben Marak, Bernita Marak aro GSMC ni Balkarin Marak uamangni kosako badi ka·doanganina rim∙na kene High Court oniko jamin na dabiangenchimoba High Court uamangni dabianiko ra·chakskajaha. Uamang sakgittam ko non-bailable Unlawful Activities Prevention Act ni ning∙o pulis dolna sal 180 na am∙sandianiko daknagita bilko pakwataha.
