Jatni dilgipa Purno Agitok Sangma ni chang 76 gipa atchiani salko gisik ra∙nagita da∙alo uni nokdangni manderang PA Sangma Integrated Sports Complex aro uni gopramona re∙ange mande ra∙aniko dakangaha. Uni atchiani salo uni jikgipa Soradini Sangma, Chief Minister Conrad Sangma, MIDC Chairman James Sangma, MP Agatha Sangma aro nokdangni manderang bi·chakanirango uko gisik ra∙angaha. National People’s Youth Front ni dilgiparang Meghalaya a∙dokni dingtang dingtang biaprango cleaning drive ko ong∙atan baksana NPP ni 11 gipa Foundation Day ko manianikoba dakangenga.
Purno Agitok Sangma saksa jatni dal∙begipa dilgipa ong·an baksana jatni aro manderangni nangnikaniko mikkango done miksongani gnang re∙mikkanggipa mande ong∙a. Sangma uni bilsi 68 ong∙o rasong gribee a∙songni skotong songjinma Delhi o rang∙gittik ka∙tongni saaniko man∙e 2016 bilsini March 4 tariko a∙gilsako wate re∙angaha.
