Mendal Don Bosco Higher Secondary School ni bi∙sarangna August 31 tariko School Mental Health Program ko North Garo Hills District Mental Health Program, Resubelpara ong∙atangaha. Ia program o pekatgipa bosturang chong∙motan drug aro chuko jakkale gisiknigita bilgrianiko man∙ani bidingo agantalate on∙angaha. Unbaksana bi∙sarangni gisepo nangana bate chanchie gisikna neng∙nikaniko ra∙baani aro jajaaniko man∙e dongenggipa chatro chatrirangna an∙tangtangko naljokate dongani cholrangko skie on∙angjolaha.
Ia skie ra∙ani program ko mandeni cholon bewal aro gisikni chanchianiko ma∙sigipa saksa, chatro chatrirangna skie on∙angaha. Gisiknigita neng∙nikaniko man∙enggipa bi∙sarang dingtang dingtang chanchianirang donge, ong∙gija ja∙kurangko de∙e an∙tangtangni janggiko pekatgipa bosturangko jakkale nosto ong∙atronga. Indakgipa neng∙nikanirangoniko naljokatna aro uamangna gisikni an∙seng baljokaniko on∙a ia programko ong∙ate yoga ko ranta ka∙dilanganikoba dakangjolaha.
