Purno Agitok Sangma 1947 bilsini September 1 tariko West Garo Hills a∙jani Chapahati songo atchiaha. Uni bilsi 11 ong∙ani somoion uamang nokdangni pagipa siani a∙selo poraianikoba dontongna nangaona sokaha. P A. Sangma ni gisik nangbeaniko aro seng∙ani gunko nike Salesian ni Father saksa Giovanni Battista uni poraianiko dakpiltainagita dakchakangaha. Pa. Sangma, St. Anthony’s College Shillongo Bachelor of Arts ko matchote Dibrugarh University-o International politics subject-o Master degree ko poraiangaha. Dibrugarh o poraimiting somoion ua Don Bosco High School ni chatro chatrirangnaba skie on∙aniko dakangaha.
India a∙songni politics ni a∙bao Pa. Sangma chubatgipa dilgiparangoni saksa ong∙a. Ua A∙chik jatni ka∙saaniko man∙e Tura constituency ni gita susae skanggipa changna 1977 bilsio Lok Sabha-ni MP ong∙na seokako man∙aha. Meghalaya a∙dokni brigipa Chief Minister seokako man∙e 1988 oni 1990 bilsiona P A. Sangma a∙dokna bimchipe dangdike on∙angaha. Ua Lok Sabha ni dal∙batgipa gadangkoba 1996 bilsio Speaker na seokako man∙e Parliament oba dilangaha. Unbaksana dingtang dingtang departmentni Minister na seokako man∙e ua a∙songna bang∙a namgnirangko dangdike on∙angaha. India a∙songni President ni gadango susanagitaba Tribal jat dilgiparangoni P A. Sangma an skanggipa susagipa ong∙aha.
India a∙songni tribal manderangna mongsongbate Northeast a∙jao songdongenggipa manderangna dingtang mancha kam ka∙na aro ku∙rang on∙a gita National People’s Party ko 2013 bilsini January jao Purno Agitok Sangma a∙bachengate donangaha. NPP an Northeast a∙jarangoni National Party na ra∙chakaniko man∙gipa skanggipa party ong∙a. Pa. Sangma be∙enigita bilgriako man∙e 2016 bilsini March 4 tariko agilsakko wate re∙angaha.
P A. Sangma an∙ching A∙chik a∙songna mangmangsan mikkim rasong ong∙aigija India a∙song gimiko dilgiparangoni saksa niksengbatgipaba ong∙angaha. Uni matsramgipa gun chi jatna ka∙sae dangdike on∙aniko uni atchiani salo uko gisik ra∙na.
