Garo Hills a∙jani NGO jekai GSU, FKJGP, ADE, FAF aro AYWO dolrang a∙doko MLHP ni kamrangna rimnapanio A∙chikrangoniko saksakoba kamna ra∙napaniko dakjani bidingo a∙dokni Chief Minister Conrad K. Sangma na chitti sedoataniko dakangaha. MLHP kamna rimnapaniko daknagita NHM oni kamna nakatataniko maming u∙iataniko on∙gija kamna rimnapaniko dakaha ine chittio janapangaha. MLHP ni kamna rimnapaniko NHM ni Mission Director an∙tang saksan dakaha aro ian sorkarini kosako ong∙gija ja∙ku de∙ani ong∙a. Indake kamna rimnapaniko dakanichi a∙dokni manderangni gisepo ma∙sisretaniko ra∙bana man∙a ine NGO dolrang janapangaha. Kamna u∙iatgija seokgipani kosako ja∙kurangko de∙china gitaba NGO dolrang didianiko dakangjolaha.
Meghalaya ni NHM Medical Officer a∙dok sorkarini Indian Nursing Council MLHP kamona rimnapaniko daknagita BSc Nursing course ko 2022 bilsini ja∙mano pass ka∙giparangkosa kamona rimnapaniko dakenga ine agane uamangko bebe ra∙atna jotton ka∙aha ine NGO rang chittio janapataha. MLHP ni kamna rimnapaniko man∙giparang bang∙batan Bethany GNM Nursing School o matchotgiparangsa ong∙a aro ua skichakramo BSc Nursing course ko skie ra∙aniba dongja ine u∙iataha. Ian NHM Mission Director ni daka kamni a∙sel a∙dokni manderangko dilsretaniona sokatenga ineba uamang janapangaha.
Indian Nursing Council ni gita MLHP kamona GNM Nursing School rangoniko rimnapnagita don∙tongataha ong∙ode mikkangchi neng∙nikanirangko naljokatnagita a∙dok sorkari Garo Hills ni ge∙sa GNM Nursing School donggipako nambata gadangona ra∙donagita nanga ine uamang dabianikoba dakangaha.
North Garo Hills, South West Garo Hills aro West Garo Hills a∙jarango MLHP kamona A∙chik saksakoba rimnapgija sak 41 gipin jatko kamona rimnapanina suk ong∙gijaniko parakataha. Ia kamko ka∙nagita ua jolo jakkalgipa ku∙sikko man∙giparang ong∙na nanga maina uamang songadamrangchi re∙esa kamrangko ka∙na nanggen. Songadamni manderang an∙tangtangni ku∙sikna agre gipin ku∙sikko agana man∙gijagiparangan bang∙bataia ineba janape u∙iataha. GNM ba BSc Nursingko poraie matchotgiparang ja 6 ni certificate program ko Community Health for Nurses o daknagita nangchengenchim ong∙ode kamona rimnapaniko dontongatchenge uamangna skie ra∙na gita somoiko on∙china didianikoba dakangaha.
