Mawsynram ni gitcham MLA aro BJP ni dilgipa Himalaya Shangpliang re∙baenggipa bilsini Lok Sabha election na skang National People’s Party (NPP) o an∙tangni napna miksonganiko mesokenga ine NPP ni saksa dilgipa aro Deputy Chief Minister Sniawbhalang Dhar August 29 tariko parakataha.
Shangpliang Lok Sabha election-na skang NPP partyo napgenchimoba Shillong Parliamentary seat na party ni ticket-ko on∙a gita maming tik ka∙anirang dongkuja ineba Dhar janapangaha. Da∙o dipet Shillongo NPP ni ticket o MP election na susaaniko dakna saksni ba sakchet mangni gita an∙tangtangni skaniko ba miksonganiko on∙enggiparang gnang. Iani bidingo chinga ru∙utgija somoini gisepo chanchirimaniko dakanggen aro ticket ko on∙anio name baseaniko dake nambatgipa aro amna kragipanasa on∙gen ine Dhar aganangaha.
NPP party-ni gita Shillong Parliamentary seat o susana gita candidate-ko re∙baenggipa September jani bon∙kamgipa antini bako bimung seokaniko dakna jotton ka∙anggen ine Dhar uiataha.
Shillong-ni Congress-ni MP Vincent H Pala ko NPP ona rimnapani bidingo kobor ra∙timgiparangni sing∙on, Pala Congress party oni ong∙a aro uko NPP ona rimnapna gita maming miksongani dongja, indiba re∙baenggipa election-o un baksa bilakbate susaaniko daknasa miksongenga ine uiataha.
Tura Parliamentary seat ni gimin sing∙on, Tura o susana gita da∙o ong∙enggipa MP Agatha Sangma ko re∙baenggipa MP election-oba party ni ticketko on∙a gita NPP tik ka∙aha ine Dhar parakataha.
