South West Garo Hills a∙jani District School Education Officer (DSEO), misiko cha∙anichi be∙en bimangna namgnirangko on∙ani bidingo chanchirimaniko dakna District Level Science Seminar ko Ampati Multi Facility Centre o ong∙atangaha. Ia programona SWGH a∙jaoni damsku skulni chatro chatrirang misini namgnirangko an∙tangtangni u∙iagita jinma baksa golporimnagita bakko ra∙angtokaha.
Seminarko ong∙atanichi Science nigita gisik a∙ning bite nama aro namgijako chanchina bi∙sarangko didina ong∙atangaha jeon bang∙a daka rikani kamrangko dakmesokangaha, PPT aro lekkarango seachi mesokanirangkoba dakangaha. Unbaksana bak ra∙gipa chatro chatrirangni u∙i ma∙sianiko sea jotanichi aro sing∙anirangko dakanichi porikka ra∙anirangkoba dakangaha.
Una agreba chatro chatrirang an∙tangtangni u∙ianio pangchake misini be∙ena nambatsranggipa cha∙ani ong∙na ammaniko jinmana parakangan baksa misiara manderangni cha∙tonike cha∙aigipasan ong∙aiama ine agansusaanirangkoba dakangaha. Ia seminar o nambatgipa chatro chatrirangna gittamgipa gadangona chegiparangko seoke trophy aro certificaterangkoba suale on∙angaha.
