Reservation policy ko nipilnagita Expert Committee na seokgimin dingtang dingtang a∙bao kam ka∙gipa manderangko a∙dok cabinet da∙al salo ra∙chakangaha. Expert Committee ko Justice (Retired) Mool Chand Gard dilanganiko dakanggen ine Dr. Ampareen Lyngdoh parakangaha. Unbaksana Constitutional Law ko u∙i ma∙sigipa Justice (Retired) Dr. Satish Chandra, Sociology ni gimin u∙igipa NEHU ni Prof. DB Kumar, Population Studies o gisik matsramgipa Prof. Chandra Shekhar, Indian Institute of Population Studies, Mumbai aro IIM Shillong ni Economics ko name ma∙sigipa Prof. Subhadeep Mukherjee, iamangan committee-ni gipin sakbri memberrang ong∙angskagen.
Ia seokako man∙gipa committee ni memberrang da∙o chalaienggipa Reservation Policy ko nipile dingtangatna nangani donggenchim ong∙ode taridapanirangko dakanggen ine u∙iatangaha. Iako dakna committee a∙dokni dingtang dingtang biaprangona re∙ange pilak a∙bao kam ka∙gipa manderang baksa golporime uamangni nangnikanirangko aro chanchianiko u∙ie ra∙anganiko dakanggen ine Lyngdoh aganangaha. Lyngdoh ni agananigitade committee na chu∙gimik kam ka∙e matchotatna bilsi sako on∙enga ine parakatangaha.
