Williamnagar Loyola College ni chatro chatrirang 2023 bilsini dokgipa semester NEHU porikkao adita department rang gadang chikkinggipa biapni ning∙ao chu∙sokgipa ong∙angaha. Chu∙sokaniko man∙gipa chatro chatrirang Garo department o Honours dakgipa sak skumang gadang chikkingni ning∙ao mark rangko bang∙bate man∙e a∙dok gimiko nambate dakgipa ong∙angaha. Skanggipa biapko Chinge B. Marak, gnigipa biapko Griksilchi R. Sangma aro gittamgipa biapko Tintin M. Marak man∙angaha.
Apsandake Education department o Honours ra∙gipa Dimchina G. Momin skanggipa gadangko man∙anangaha aro unbaksa porairimgipa Janubell G. Momin bongagipa gadangko man∙angskaaha. Unbaksana English subject ko Honours ra∙e poraigipa Thenia G. Momin gittamgipa gadangko man∙aha aro chetgipao Aldhitalchi R. Marak man∙angaha. Economics department ni Cheama S. Momin saksa kamkam snigipa gadangko man∙angaha. Loyala Collegeni ia namgipa biteko on∙aniara collegena mikkim rasong aro jattangna dal∙a dakmesokaniko ra∙baani ong∙a. NEP ko ra∙gatanioba Loyola College ge∙sa ong∙pae a∙jani chadamberangna mikkangchinaba bidako pakwatanio nambee dakchakaniko on∙angenga.
