Williamnagar songjinmao songdongenggipa manderangni batrikrikaniko nike, chadamberangna a∙jao porikka sechakram biaprangko songe on∙chinagita Garo Students’ Union (GSU) dolrang a∙dokni Chief Minister Conrad Sangma ko mol∙molaniko dakangaha. GSU rangni Chief Minister ko gronge janapanio uamang Meghalaya Public Service Commission (MPSC) porikka sechakram biaprangko a∙bachengate on∙chinagita didiangaha.
Porikka sechakram biaprangko ra∙bae on∙aniara namen nangchongmotgipa ong∙a maina a∙dokni gipin biaprangchi porikkako sena re∙anio chadamberang bang∙a neng∙nikanirangko chagrongna gita nanga. Ia gital porikka sechakram biaprangko a∙bachenge on∙anichi songsalna namgninasan ong∙aigija, kamrangko sandienggipa chadamberangna sorkarini gita namgipa ja∙kuko de∙ani ong∙gen ine GSU dolrang aganangaha.
2018 bilsio oprake on∙gimin Williamnagar ni Polytechnic skie ra∙chakram biapo kam ka∙anirangko dakujaengani giminba a∙dok sorkari iani bidingo nama ja∙ku de∙aniko dakchinagita didiangaha. Unbaksana District Institute of Education and Training (DIET) ko ra∙bae on∙china aro janapgimin High Court Bench koba songe on∙china gitaba uamang didianiko dakangaha.
