Mijal salni bako Ri Bhoi a∙jani Ninth Mile, Baridua-o bilsi 46 ong∙gipa K Mukhim ko, jean Khanapara pulis station ni ning∙o ga∙akgipa Bara Killing songoni ong∙achim, chakka ronggnigipa gariko ramao salengako ro∙ong salgipa gari USTM sepango salpakangaha ine koborko on∙ataha.
Ua ro∙ong salgipa gari-ara Uranus Stone Products Ankit Mittalni Nagaland o register ka∙gipa ong∙achim. Ua gariko salgipa mande a∙sel ong∙gipaoni kataha aro Mukhim ko Nongpoh Civil Hospital-ona tarakbee rimangenchimoba hospital-ona sokarin janggi galaha ine parakataha.
A∙sel ong∙gipa biapo bang∙a manderang chimongaha aro mitam manderang ka∙onanganian gape gariko so∙chipaha, indiba somoi gita pulis sokbae wa∙alko kimitna man∙aha.
