Senokgipa
Sonatchi Manda Sangma
West Garo Hills a∙jani Jenggitchakgre songni AMA Food Product-ni nokgipa Ma Baldilla T Sangma Jenggitchakgre songni saksa chonaonin dukko chake dal∙bagipa saksa ong∙a. Ua uni bilsi 15 ong∙aonin ICDS-o Anganwadi-ni kamko ka∙na a∙bachengaha aro unomiting tangka 300 kosan man∙aiachim. Ua dontonggija bimchipe bilsi 27 ong∙na am∙pile kamko ka∙genchimoba maming tangka paisani gita baridapanirangko man∙jaha. Ua somoi salrango ua namen neng∙nikanirangko, saia inteka, chonnikarangkoba man∙aha. Ja∙mano ua dormaha 4500-ko man∙ahaoba kamrang bang∙roroe neng∙nikanirang batrikrikskaha.
Uni janggi tanganio neng∙nikanirangko naljokatna maikoba cholkode dakna nanggen ine chanchie 2014 bilsio Basin Development office-ona re∙ange sing∙sandianirangko dakaha. Basin Development office-ni Madam saksa uko te∙brong chips-ko tarianiko skie ra∙na gita training dongna sing∙ahaon ua jechakgija uko ra∙chakaha. Antisani ja∙mano uko Tura Sangsanggre-o donggipa Central Agricultural University, College of Community Science-ona jackfruit training-ko dongna okamako man∙e re∙angaha. Ia training-o te∙brongoniko dingtang dingtang cha∙ani tarianikoba skia man∙aha jekai chips, chana, biscuit, juice, squash, Jem, jelly aro achar-rangko skia man∙aha.
Tebrong-niko bosturangko tariani training-ko skia man∙ani ja∙man bakan uko jagipino Bangalore-ona sal chikkingna training-ona skie ra∙na watatskaaha. Uni ja∙mano uko chotchangpilgija Guwahati aro Shillong-onaba skie ra∙an gita cholko on∙e watatako man∙angaha. Ua dingtang dingtang biaprango skia man∙ani ja∙mano noko ka∙sinsin tarina a∙bachengaha. 2015 bilsio ua uni tarigimin bosturangko bimang ong∙atna a∙bachenge uni tarigimin bosturang-ko biming mingna gita chanchie AMA Food Products ine don∙a miksongaha.
AMA food products-ni miksonganiara ua ma∙gipa saksa ong∙e uni changa sapaniko jakkale nokdango dedrangko, segipako dakchakpae namdape janggi tangdilna man∙agita aro dedrang su∙drangba iako nike skie ra∙e daksninge ripinge mikkangchi janggi tangangna gita man∙gen ine ua uni tarigimin bosturangko AMA Food Product ine don∙aha. Uni jamano Chief Minister Scheme E-Championship-o bako ra∙e tangka Lakh 1 ko man∙e dakchakaniko man∙angaha indake uni bimchipe gisiko nange neng∙e dike cha∙aniko nike MIDH Horticulture Department-ni gita tangka Lakh sa hajal kolatchiko on∙e dakchakatskaaha. Jamano una Meghalaya PRIME HUB-ba Lakh sa hajal sotsni-ni loan-ko interest-gri on∙e dakchakaha.
Songo noko donggipa bolam biterang indin ga∙ake dongengiparangko ua breskae uko kolna hajira ra∙e manderangnaba gongsa gonggni on∙skae kam ka∙atanichi uamangni nokdangnaba dakchakskaniko on∙e uamangni janggi tanganiko namdapatani cholba on∙enga. Ja∙mano ua uni bimchipe jotton ka∙anichi Vibrant North East-oniko Lakh bonga tangka paisarangko man∙angaha. Indake uni bimchipe jotton ka∙anichi ramram mandeoni ua da∙o saksa chu∙sokgipa Entrepreneur ong∙skaaha. Ua uni changa sapaniko skul aro college-o poraienggipa chatro chatrirangnaba skie on∙anganikoba dakenga.
Uni indake gisiko nange jotton ka∙anira an∙ching sakantinan namgipa skidapani aro didiataniko on∙a. Ua chonaonin neng∙nikarangko man∙e janggi tangbae skia poraianioba chu∙sokgipa ong∙jagenchimoba aro ku∙sikrangko agananio nengnikgenchimoba dontonggija uni kamko jotton ka∙angkuaha. Indake ua da∙o bimchipe kam ka∙e an∙tangni dedrangrangko poraiatanio dingtang biaprangona watate poraiatna gita dakchakanikoba man∙skaenga. Mikkangchi ua India-ni apalrangonaba re∙angani miksonganirang donga. Uni chu∙sokanian sakantinan namgipa dakmesokani ong∙a an∙ching miksonga gnang jotton ka∙genchimode chu∙sokgipa ong∙na gita man∙aigen.
