Meghalaya-ni cha∙tobegipa Anaros-rangko mesokna ‘Pineapple Fest 2023’ ko a∙songni skotong songjinma Delhi o re∙baenggipa August 18 tarikoni Dill haat-o ong∙atangna miksongenga. Iako salgittamna Sukrobar saloni dingtang dingtang dakmesokanirang baksa cultural program-koba ong∙atanggen ine Robibar salo official-rang u∙iatangaha. Batanggimin salrango Meghalaya ni anaros-rangko Abu Dhabi mall-o jinmana mesokataniko nikaha jekon da∙o apsandake Delhi oba dakangskagen.
Meghalaya sorkarini official-rangni aganani gitade a∙dokni chi∙batsranggipa anarosrangko Abu Dhabi-ni Al-Wahda Mall-o mesokaniko dakangengaha jekon Lulu Group-ni gita Gulf Market-ona palataniko dakatskaenga. Meghalaya a∙doko ma∙manti a∙bri buring bolgrimrang donga jean rokomanti ge∙e game cha∙ani aro bol bite, pul bibalrangko ge∙aniko manderang dakenga. Songdongkamgipa manderangni maming samrangko on∙gija ge∙aniko dakbewalrangni gita dakanichi nambatgipa bolam biterangkoba man∙a gita man∙enga. Meghalaya a∙dokni anaros-rang maming samrangko satjani gimin chi∙ani bate aro mesenga komiani a∙selo gipin a∙jarangni anarosrang baksa namen dingtanggrika.
