2023 bilsini Bilgaro 2W Bike Rally Challenge-ko August 10 tariko Tura Rongkhon Aldara Cafe-oni a∙bachengataha. Ia rally ko da∙aloni a∙bachengate August ni 12 tariko matchotatgen ine kobor na parakataha. Da∙al salo rally o bak ra∙nagiparangko name dake porikka ra∙aniko dakangaha aro uamangni jakkalnagipa bikerangkoba nie ra∙angjolaha. Rally o jakkalna nanggipa bosturangkoba Tura Motor Sports Club (TMSC) niangan baksana ja∙rikna nanggipa niam retirangkoba agane on∙angaha.
Ia 2W Moonsoon Bike Rally Challenge-ko TMSC dolrang gipin dolrang melie baksa ong∙atenga. Rally o jakkalnagipa rama jal∙angrangko agane on∙angan baksana ong∙atenggipa official-rang bak ra∙enggiparangna agan ku∙pattianirangkoba dakangaha. Iano bak ra∙enggiparang Garo Hills-ni mangmangsan ong∙aigija a∙dokni dingtang dingtang a∙jarangoni chongmotan Khasi Hills, Jaintia Hills aro Assam a∙dokrangoniba bakko ra∙angenga.
Bilgaro 2W Bike Rally ko Tura Motor Sports Club (TMSC) re∙anggipa 2019 bilsio a∙bachenge ong∙ate da∙o gnigipa changna ong∙ataniko dakenga. Unbaksana Bilgaro 4W Rally koba 2017 aro 2018 bilsioba uamang ong∙atangaha.
