WGH a∙jani Phulbari pulis station-ni ning∙ao donggipa Chibinang songoni Anishur Rahman-ko bilsi 14 ong∙gipa me∙chik bi∙sa saksako rim∙srukanio jak donganina dosi donga ine rim∙a man∙e pattoko donataha. Ia me∙chik bi∙sa Chibinang bazar-oni Rahman-ni salenggipa auto-o 2017 bilsini March 14 tariko pringni 10:30 bajimango gadobaaha jeon uko rim∙sruke ma∙sina man∙gijagipa biapo donnuaha ine parakataha. Ia ong∙a obostani bidingo rim∙srukako man∙gipa nokdangni manderang Tura Women PS na 2017 bilsini March 18 tariko Case No. 17(3)2017 u/s 366A/368 IPC R/W sec 3(a)/4 POCSO Act o pangchake UBSI Renu D. Sangma-na badi ka∙doangaha.
Pilak dakna nanganirangko matchote, West Garo Hills Tura POCSO ni Special Judge potchipgipa mandeni kosako sakkirangko man∙e Section 3 (a)/14 POCSO Act o pangchake dosi donga ine parakataha. Dosi donggipa mandeko bilsi 7 na pattoko donatna tik ka∙an baksa tangka gong hajal 5 ko gamna ge∙etataha. Dongimin tangkarangko gamjaode uko niamo pangchake ja gittamna ra∙dapgimin somoina pattoko donatna rai on∙ataha.
