A∙dokni CM Conrad Sangma aro unbaksa adita Cabinet dilgiparang Mongolbar salo Prime Minister Narendra Modi ko gronge memorandum ko on∙angaha. Uamang dintangmancha a∙dokni nangchongmotgipa kamrangko niatpachina Prime Minister o mol∙molangaha.
Meghalaya a∙dokni nikjumanggipa 10 billion kajina man∙aniko bilsi 5 ni gisepo chu∙sokatna miksonganiko Sangma PM Narendra Modi-na janapangaha. Cabinet dilgiparang Externally Aided Project (EAP) ni bidingo janape on∙angaha jeon Sangma a∙doko kajina man∙anio EAP ni gamchatanikoba PM na parakangaha. 10 billion kajina ra∙baaniko chu∙sokatna a∙doko kajina man∙aniko changgnina bariatna nangao ga∙akenga jeon bimangni gita rika cho∙aniko aro janggi tanganiko tang∙doatna nangenga ine Sangma agandapangaha. Ia miksonganiko chu∙sokatna Narendra Modi Meghalaya a∙dokna dakchakaniko on∙a ra∙chakaha ine Sangma parakangaha.
Inner Line Permit (ILP) ni bidingo 2019 bilsioni a∙dokni assembly o dabina ra∙chakgiminkoba PM na janapangaha. Adita bilsirangna skangan ILP ni bidingo niatpachina Meghalaya sorkari Ministry of Home Affairs ni aganchakaniko senge dongkuenga. ILP ko a∙doko ra∙gatna nangnikaniko PM knachakaha aro kamrangko ka∙na ra∙chakaniko Conrad Sangma mijal salni bako parakangaha.
Meghalaya aro Assam a∙dokni damdok sima ari jolrango nanggrikronggipa biaprango tom∙tomaniko ra∙bana Sangma PM ni dakchakaniko am∙angaha. Unbaksana iarangko nambate kam ka∙na gegittam regional committee rangko songe on∙anikoba Sangma PM na janapangjolaha. Pilak janapgimin kamrangko aro a∙doko neng∙nikanirangko knachake niatna ra∙chakanina Chief Minister, Prime Minister ko mittelpilani kattarangkoba aganangaha.
