Undergraduate-ni skanggipa semester o poraienggipa chatro chatrirang National Education Policy (NEP) 2020-ko ra∙gatana nangnikaniko parakangaha. NEP-ko ra∙gataniko nangnikgenchimoba skigiparangni namnikaniko ku∙rachakani ja∙mansa pilak dakna nanggni kamrangko ka∙nagita nanggen ine aganatskaaha. NEP-ko ra∙gatna ja∙ku de∙aniara chatro chatrirangni namgninasa ong∙a ine 2023 bilsi-o HSSLC (Arts) porikka-o gnigipa gadango chu∙sokgipa Avelyne Francisca Khriam aganaha. Khriam St. Edmunds-o Four Year Undergraduate Programme (FYUP) ba bilsi bri-ni course-ko skanggipa semester-o poraienggipa saksa ong∙a. Jekoba gital dake a∙bachengatanio neng∙nikarang pangnan dongrongaiagita, apsan daken NEP ko ra∙gatanioba namgni aro namgijaniko chagrongna nangaigen ine ua aganaha.
Iako ra∙gatna gita rika cho∙anirango aro gital subjectrangko skinagita skigiparangni tarisamsoanio pangchakgen ine Khriam agandapaha. Apsan daken collegerango rika cho∙anirang chu∙ongjagenchim ong∙ode ia bilsioni NEP ko ra∙gatna on∙genma on∙jawa ukoba u∙ichengna nanggen ine ua aganaha.
Dingtang dingtang college rango poraienggipa chatro chatrirang NEP ko university-o ra∙gataniko ra∙chakna man∙kujawa aro iako ra∙gatanio darangkoba mikkang nitegija dakna nanga ine parakataha. NEP ko drae ra∙gatna miksonganiara nama ja∙ku de∙ani ong∙ja maina iarangni bidingo Meghalaya a∙dok skangonin ja∙manchakrikaha ineba aganaha. Beben iako ra∙gatanichi mikkangchina nambata aro apalbata miksonganirang gnang maina ge∙gipin stream oniko subjectrangko basenagitaba cholko on∙anggen ine aganangskaaha.
NEP ko ra∙gataniara nangchongmotgipa ong∙a indiba gitalgipa courseko rang∙gitik ra∙gatanichi mongsongbate songadamni chatro chatrirang ja∙rikanio neng∙nikanirangko chagrongnaba donga ine Lady Keane college ni Lamangpura aganangaha. Ia gital policyni gimin skigiparang aro chatro chatrirang name u∙ie ma∙sichenggija maikai ra∙chakna amgen ineba ua agandapangaha.
