Shillong songjinmao Nursing job fair ong∙atgipao a∙dokni aro India ni a∙palo kamrangko on∙a a sorkarini rake kam ka∙enganiko Chief Minister Conrad Sangma janape aganangaha. Sak 1000 nurse rang biming segataniko dakangaha aro seokako man∙giparangna tangka gong 50,000/- ko one dakchakanirangkoba on∙a janapangaha.
A∙dok sorkarini gita uamangna a∙gilsakni je biapoba kamrangko am∙e on∙a rakbee kamrangko ka∙anggen ine Chief Minister parakangaha. Bang∙a nurse rang jemangan kamgri ong∙e dongenggiparangna dingtang cholrangko ra∙bae kamko dangdike on∙anggen ineba Sangma aganangaha.
Gisiko nanggipa nurse sakantian an∙tangtangni changa sapaniko namdapatna tarian baksa gipin a∙songo technologyko jakkalanirangkoba skie ra∙china aro je biapona sokanggenchimoba biapni kri ku∙sikrangkoba skie ra∙chinagita Health Minister Ampareen Lyngdoh didianirangkoba dakangaha.
