Tura CM office-o July 24 tariko ong∙anggipa obostao political dolrangko dosi gale agana nangja ine BJP ni dilgipa aro Cabinet Minister AL Hek aganataha.
Ia kajia golmalni bidingo a∙dokni pulisrang political dol aro organization rangko dosi gale aganani ong∙ja maina skatang dakgipa namgijagipa manderangde je biapoba dongaia ine Hek kobor ra∙timgiparangna parakataha.
Ua a∙sel ong∙anio bak donggiparangko sak 47 mangna bate rim∙aha maina uamang CM Conrad Sangmako so∙otna mangsonga gnang dakahachim ine pulis dolrang u∙iataha. “Anga BJP ni ong∙oba, angko dosi galbo BJP ko ong∙ja, maina BJP de dosko dakja aro manderangni biming baksa political dolrangni bimingko segate on∙chapaniko anga raken jegala” ine Hek aganangaha.
Ua chadrapaniara politics dolrangni didianichi ong∙ja indiba rim∙a man∙gipa manderang an∙tangtangni skaniosa dakangaha ineba Hek u∙iataha.
Hek kajia golmal aro chadrapani gimin jakgitele am∙sandianiko dakchina dabianiko namnike ra∙chakangaha. Ia mamlani bidingo name am∙sandianiko dakna nangchongmota jedakode chongmot ba kakketgipa ja∙pangko ma∙sinagita man∙gen ine ua agandapangaha.
