July jani 24 tariko Tura-o so∙sojengjeng ong∙atanio rim∙a man∙gipa sak 6 chatrorangko watpilchina Garo Students Union (GSU) dolrang dabiangaha. Rim∙ako man∙gipa chatrorang dingtang dingtang nanganirangna re∙angakosa rim∙chapaha ine Chief Minister Conrad Sangmana chittio see u∙iataha. Kajia golmal ong∙anggipa biap Tura songjinmani mongsonggipa jakkalna nanggipa rama ong∙a ine GSU aganangaha.
Ua obosta ong∙anio rim∙ako man∙gipa chatrorang Bartho Ch. Sangma (19), Gamchu R. Sangma (20), Bregimseng S. Marak (19), Tengchang D. Sangma (20), Pangchu R. Sangma (18) aro Akandrik A. Sangma (21) ong∙a. Ia chatrorangara bilsini gitaba chu∙sokkugijagipa chadambe bi∙sarangsa ong∙a ine u∙iataha. Uamangko rim∙e donaniara uamangni mikkangchi janggi tanganiko bon∙chongdikataona ra∙baani ong∙gen ineba GSU-ni President Tengsak G. Momin chittio janapataha.
Rim∙a man∙giparangoni saksa Silseng Ch. Momin jean West Garo Hills a∙jani Ringgi Songgitalgre songoni ong∙achim ua an∙tangni motorcycle-ko Nazing bazaar FCI godown rama paksao tyre nosto ong∙e tarina gita dokanrangba chipani a∙selo done re∙angosa rim∙ako man∙aha. Jensalo garirangko so∙ani korborrangko man∙soe kenjagokenba ua South West Garo Hills a∙jani Gopinathkilla songni Lasbert M. Marak baksa uni motorcycle-ko ra∙na re∙bae sikdoangmiting somoio pulisrang uamangko rim∙aniara kakket ong∙gijani kam ong∙a ine GSU-ni President agandapangaha.
