Miss Meghalaya aro Miss Teen Meghalaya ko ong∙ataniona re∙baenggipa August 12 tariko Shillong Youth Hostel-o Audition ko ra∙na Miss Meghalaya Organisation tik ka∙angaha. Meghalaya Youth Tourism Development Society ni ning∙ao Miss Meghalaya Organisation ni ong∙atgipa beauty pageant ni grand finale ko re∙baenggipa September 9 tariko U Soso Tham auditorium o ong∙atna tik ka∙angaha ine kobor ra∙timgiparangna parakataha.
Miss Meghalaya aro Miss Teen Meghalaya o chegipana tangka gong 2.80 lakh ko on∙na aro a∙dokni palo ong∙e Miss India-o susaaniko dakna cholko on∙anggen ine janapangaha. Bon∙kamgipa salo dakmesokanio me∙pilipni ba∙rarangko aro dingtang dingtang ganding chindingrangko gane mesokanirangkoba dakanggen. Ia dakmesokaniko ong∙atanio skanggipa sal chikking na tarisamsoanirangko August 28 oni September 8 tarikona ong∙atangchenggen ine ia program ko ong∙atenggiparang u∙iataniko on∙angaha.
