Meghalaya a∙doko MeECL department bijolini wire rangko nirok simsakgijani a∙sel manderangni bijoli nange siako janape Meghalaya State Health Advisory Board ni Chairman Mayralborn Syiem Power Minister A T Mondal-na chitti see nirokatchina u∙iataha.
Re∙anggipa salrango Umden Umshaken ramao saksa mandeni chakka ronggnigipa motor gario re∙angmitingo PWD ramao wire chote donggipao nange a∙sel ong∙e sianiko janape Syiem aganangaha. Dingtang dingtang a∙dokni bakrangoba indakgipa obostarangko chagrongani a∙sel manderang janggiko gimaatna nangenga ine Syiem aganaha. Indakgipa obostarangko mikkangchi chagrongtaijanagita ta∙rake nirokatchina Power Minister ko mol∙molangaha.
Sianggipa mandeni nokdangna janggi gimaani palo man∙a dipet cholrangko am∙e ta∙rake on∙pilskaanirangko dakchinaba Power Minister ko Syiem didiataha.
