A∙dokni reservation policy ko pora-skiani a∙ba rango jakkalenganina mikkangchakgrikgipa dol VPP ni dilgipa saksa Adelbert Nongrum Bristibar salo sing∙doaniko dakangaha. 2023 bilsini NEET porikkao jemangan nama gadango chu∙sokgipa ong∙achim uamangna a·dokni quota-o 2023-24 bilsini dingtang dingtang medical ni a∙bao admission rangna biapko on·angaha. Seokgimin bimingrangko gadang gittam dake sulsul on·angaha jean open category na sak 30, Khasi-Jaintia na sak 150 aro Garo na sak 150 chatro chatrirangni bimingrang seokako man·aha.
Poraiani gadangode roster systemni gita kam ka·ja ine Chief Minister ni batanggimin salo kobor ra·timgiparangna parakataniko niknagita man∙aha. Ua seokgimin bimingrangko niatgenchim ong·ode ia quota-ora maikai roster ni gita bimingrangko seoknagita nanga ine Adelbert Nongrum skanggipa sing·doaniko dakangaha.
May 13, 2022 bilsio Health and Family Welfare department ni office memorandum-o pangchake Meghalaya a·doko MBBS na seokaniko dakna tik ka·gimin donga aro gadangprakon chatro chatrirangni chu·sokani kri biapko on·e reservation policyni gita kam ka·na office memorandum-o talate on·aha ine ua aganaha.
A·doko poraiani gadango reservation policy ko jakkalani niam dongjagenchim ong·ode badia niamo pangchake ia seokanikora dakaha ine ua singaha. State reservation policy-ara a·doko kam on·ani bidingosan ong·genchim ong·ode maikai iako ja∙rikanichi chatro chatrirangna namgniko ra·bagen ba uamangna kam ka·anggen ine ua sing·doanikoba dakangaha.
