July 24 tariko CMO, Tura ko chadrapani gimin jakgitele am∙sandianiko dakchina unbaksana Director General of Police (DGP) Dr. LR Bishnoi aro Turani SP ko dikdiksana kamoniko dondikatchina All India Trinamool Congress (AITC) dabiangaha. Chief Minister aro bang∙a manderang jemangan unsalo tom∙bimonganio bakko ra∙anggiparangni janggiko kenbegniona ra∙baanina matnange aganataha.
Turao kajia golmal ong∙gipa obostani gimin High Court ta∙rake am∙sandianirangko dakna nanga ine uamang dabiangaha. Ia dabianiara ua ong∙gipa obostao kajia golmalko ong∙atna manderang manchisoa gnangsa kamko ka∙aha ine DGP ni parakatani ja∙mano ong∙aha. Pulis dolrang DGP-ni dilanio ma∙sisamsogenchimoba ua obostako name simsaksona aro naljoke rakkina chu∙sokgiparang ong∙jaha ine matnange aganataha. Re∙anggipa salrango saksa Cabinet Minister ni Turaona re∙bao pulis department ni simsaksogijaniko social media rango parakatanirangkoba janapjole aganangaha.
Pulis dolrang ma∙sieba kajia golmal ko ong∙na on∙aha aro Chief Minister, dosgri manderang, me∙chikrang, dilgiparang, political partyrang aro NGO-rangni janggiko kenbegniona ra∙baaha ineba aganangaha. DGP ni aganani gita Chief Minister ko manchisoa gnange uni elakaon chadrapaha ong∙ode, uni elakani manderangan Chief Minister ko chadrapna miksongenga aro Chief Ministerna namen kenchakani ong∙enga ineba AITC dol aganaha.
TMC, manderangni namgija kamko ka∙e so∙sojengjeng ong∙ataniko raken jegala aro je cholchiba tom∙tomaniko rakkina nanga ine parakataha. Neng∙nikani ba nangnikanirangko kajia golmalchi chu∙sokatna man∙jawa indiba name agan-golpogrikanichisa chu∙sokatna amgen aro manderangko naljoke rakkina man∙gen ineba agandapangaha.
