South Garo Hills a∙jao bijoli den∙aniko dontongchina mol∙molnagita Garo Students Union (GSU) Southern zone ni dilgiparang Power Minister AT Mondal aro Baghmara ni MLA Kartush R. Marak ko gronge chitti on∙angaha. Gipin a∙jarango bijoli den∙aniko dontongatgenchimoba SGH a∙jao da∙o jadok ong∙pilomangba ra∙galkuja ine uamang aganangaha.
Bijoliko den∙ani a∙sel wilwilao donggipa skul, office aro manderangna bang∙a neng∙nikanirangko ra∙baenga ine uamangni suk ong∙gijaniko parakataha. Ia ong∙enggipa obostani bidingo a∙dokni Power Minister, MeECL-ni Chairman cum Managing Director (CMD) Sanjay Goyal baksa golpoaniko dake kamrangko nirokatna namgipa ja∙kuko de∙anggen ine ka∙dongataniko on∙angskaaha.
