Chief Minister Conrad Sangma, ACHIK dolrangko uni Garo Hills-ona re∙baani somoio grongna miksonganiko Bristibar salo parakangaha. Sangma ni aganani gitade winter capitalna dabianiara a∙dokko nirok sandie kam ka∙aniko ba administration-ko sepangbatatna aro mini-secretariat ko posae on∙a ja∙ku de∙anian ong∙a. Winter capitalko songna chanchianiko MDA sorkari pangnan dal∙nike ra∙a ine ua agandapangaha. Sangma uamangni dabianiko name u∙ie ra∙enga jeon additional DC, gipin officialrang aro doctor rangko biapo pangnan donkamenga.
Turao mini-secretariat ko ra∙bana miksonganiara namen dal∙a ja∙ku de∙ani ong∙a aro iako bang∙a dolrangan ma∙sia. Uamang baksa asonge golporimengon mini-secretariat ni gamchatanikoba chinga agantalatna cholko man∙gen ine ka∙dongsoenga. Governor-ni nokba matchotnasiengaha jekon ia bilsini December jao matchotate, kam ka∙aniko a∙bachengatna amgen ine Sangma parakangaha.
Roster systemni bidingo aganatskaengon sorkari gimikni raiko ra∙chake ja∙ku de∙manaha aro iako ACHIK dolrang baksaba golpoaha jeon uamangba tom∙anio dongpaachim ine Sangma parakangaha. ACHIK dolrang sing∙doanirangko dakaha jeon uamangna nanggipa aganchakanirangkoba agantalate on∙angaha. Tom∙bimongani ja∙manosa OM-ko kimkime ra∙gataha aro iako nipiltaianide chingna neng∙nikani ong∙gen ine Conrad Sangma parakangaha. Iasan ong∙aigija sorkari pilak department rangko namdapatna krengenga aro ian dingtanganiko pilak biaprangona sokate a∙dokko chu∙gimik tangdoatna kam ka∙angenga ine Sangma agandapangaha.
